கொரோனா முகாம் பேராசிரியர்கள் அச்சம்.

 கொரோனா தனிமை முகாமாக செயல்படும் கல்லுாரிகளில், பணிக்கு வர சொல்வதால், இன்ஜினியரிங் கல்லுாரி பேராசிரியர்கள் பீதி அடைந்துள்ளனர்.ஊரடங்கு படிப்படியாக தளர்த்தப்பட்டு வருகிறது.

தமிழகத்தில், நேற்று முதல் அரசு ஊழியர்கள் மற்றும் ஆசிரியர்கள், சுழற்சி முறையில், அலுவலக பணிக்கு வர அறிவுறுத்தப் பட்டுள்ளனர். கல்லுாரி ஊழியர்கள் மற்றும் பேராசிரியர்களும், சுழற்சி முறையில் கல்லுாரிக்கு வந்து, பணியாற்ற உத்தரவிடப்பட்டுள்ளது. ஆனால், பல அரசு கல்லுாரிகள் மற்றும் பல்கலையின் உறுப்பு கல்லுாரிகளில், கொரோனா தனிமை முகாம் ஏற்படுத்தப்பட்டு உள்ளது. அவற்றில், வெளி மாநிலங்களில் இருந்து அழைத்து வரப்பட்டவர்கள் தங்க வைக்கப்பட்டுள்ளனர்.

இந்த கல்லுாரிகளுக்கு, பேராசிரியர்கள் மற்றும் பணியாளர்கள், அலுவலக பணிகளுக்கு வந்தால், ஏதாவது ஒரு வகையில், தங்களுக்கும் தொற்று பாதிக்கும் என, அச்சம் அடைந்துள்ளனர்.எனவே, கல்லுாரிகளில் இருந்து தனிமை முகாம்களை மாற்றும் வரை, அங்கு பணிக்கு வருவதில் இருந்து விலக்கு அளிக்க வேண்டும் என, பேராசிரியர்கள் கோரிக்கை விடுத்துள்ளனர்.