பணப் பட்டுவாடா தாமதம்:ஆசிரியர்கள் கடும் அதிருப்தி.

அரசு பொதுத்தேர்வு விடைத்தாள்கள் திருத்தியதற்கான ஊதியம் வழங்குவதில்

தாமதம் ஏற்பட்டுள்ளதால், ஆசிரியர்கள் அதிருப்தியடைந்தனர்.விழுப்புரம் மாவட்டத்தில், விழுப்புரம் அரசு பெண்கள் மேல்நிலைப் பள்ளியில், பத்தாம் வகுப்பு விடைத்தாள்கள் திருத்தும் மையம் அமைக்கப்பட்டது. இங்கு, விடைத்தாள்கள் திருத்தும் பணியில் நேற்று, 196 ஆசிரியர்கள் பங்கேற்றனர். நேற்று மதியம் 2:30 மணியளவில், கணக்கு பாடம் விடைத்தாள் திருத்தும் பணி முடிவடைந்ததும், பயணப்படி, விடைத்தாள் திருத்தியதற்கான சம்பளத்திற்காக, ஆசிரியர்கள் காத்திருந்தனர். இரவு 7:30 மணி வரை, தொகை வழங்கப்படாததால் ஆசிரியர்கள் ஆவேசமடைந்து, அதிகாரிகளிடம் முறையிட்டனர். இதையடுத்து, இரவு 8 மணிக்கு, ஆசிரியர்களுக்கு தொகை வழங்கப் பட்டது. இச்சம்பவத்தால் விடைத்தாள் திருத்தும் மையத்தில், திடீர் பரபரப்பு ஏற்பட்டது.