1,408 பேருக்கு ஆசிரியர் பணி: அமைச்சர் சுப்ரமணியன் தகவல்

''ஆதிதிராவிடர் மற்றும் பழங்குடியினர் நலத்துறை பள்ளிகளில், காலியாக

உள்ள, 1,408 ஆசிரியர் பணியிடங்கள், விரைவில் நிரப்பப்படும்,'' என, அமைச்சர் சுப்ரமணியன் தெரிவித்தார்.

இது குறித்து, சட்டசபையில் நடந்த விவாதம்:

மா.கம்யூ., டில்லிபாபு:

வன்கொடுமை தடுப்பு சட்டத்தின் கீழ் பதியப்படும் வழக்குகளை விசாரிக்க, மாவட்டம்தோறும், தனி சிறப்பு நீதிமன்றம் அமைக்க வேண்டும்.

அமைச்சர் சுப்ரமணியன்:

ஏற்கனவே, நான்கு நீதிமன்றங்கள் உள்ளன.

 இ.கம்யூ., லிங்கமுத்து:

ஆதிதிராவிடர் மற்றும் பழங்குடியினர் நலத்துறை பள்ளிகளில் உள்ள, காலி ஆசிரியர் பணியிடங்களை நிரப்ப வேண்டும்.

 அமைச்சர்:

1,096 ஆதிதிராவிடர் நலப்பள்ளிகளில், 1.27 லட்சம் பேர்; 301 பழங்குடியினர் உண்டு, உறைவிடப் பள்ளிகளில், 31,594 பேர் படிக்கின்றனர். இப்பள்ளிகளில், 11,412 ஆசிரியர் பணியிடங்கள் உள்ளன; 10,004 ஆசிரியர்கள் பணிபுரிகின்றனர். தற்போது, 1,408 ஆசிரியர் பணியிடங்கள் மட்டும் காலியாக உள்ளன. அவற்றையும், ஆசிரியர் தேர்வு வாரியம் மூலம், விரைவில் நிரப்ப, முதல்வர் உத்தரவிட்டுள்ளார்.

  புதிய தமிழகம் கிருஷ்ணசாமி:

நலத்துறை பள்ளிகளில், கல்வி அதிகாரிகள் ஆய்வுக்கு செல்வதில்லை. வருவாய் துறை அதிகாரிகள் தான் செல்கின்றனர். இதனால், இப்பள்ளிகளில் தேர்ச்சி விகிதம் குறைவாக உள்ளது. இதை தடுக்க, நலத்துறை பள்ளிகளை, கல்வித்துறையோடு இணைக்க வேண்டும்.

 அமைச்சர்:

தேர்ச்சி விகிதம், ஒவ்வொரு ஆண்டும் அதிகரித்து வருகிறது. கடந்த ஆண்டு, 10ம் வகுப்பில், 82 சதவீத பேர், பிளஸ் 2 தேர்வில், 82 சதவீத பேர் தேர்ச்சி பெற்றுள்ளனர். இவ்வாறு, விவாதம் நடந்தது.