ஏற்கனவே அறிவித்தபடி நாளை மருத்துவ பொது நுழைவுத் தேர்வு நடக்கும்: சுப்ரீம் கோர்ட் திட்டவட்டம்

எம்.பி.பி.எஸ்., பி.டி.எஸ்., மற்றும் மருத்துவ பட்ட மேற்படிப்பு மாணவர் சேர்க்கைக்காக நாடு முழுவதும் ஒரே மாதிரியான தேசிய தகுதி நுழைவுத்தேர்வை (என்.இ.இ.டி.) நடத்த வேண்டும் என்று அனில் ஆர்.தவே தலைமையிலான சுப்ரீம் கோர்ட்டின் 5 நீதிபதிகள் அரசியல் சாசன அமர்வு கடந்த 11-ந் தேதி உத்தரவிட்டது. இந்த ஆண்டே நுழைவுத்தேர்வை நடத்த

உத்தரவிட வேண்டும் என்று கேட்டு சங்கல்ப் அறக்கட்டளை தொடுத்த ‘ரிட்’ வழக்கை சுப்ரீம் கோர்ட்டில் நீதிபதி அனில் ஆர்.தவே தலைமையிலான 3 நீதிபதிகள் அமர்வு விசாரித்தது. நாடு முழுவதும் மருத்துவ மாணவர் சேர்க்கைக்கு தேசிய தகுதி நுழைவுத்தேர்வை (என்.இ.இ.டி.) 2 கட்டங்களாக மே 1-ந்தேதியும், ஜூலை 24-ந்தேதியும் நடத்த அந்த அமர்வு, உத்தரவிட்டது. தேர்வு முடிவுகளை ஆகஸ்டு 17-ந்தேதி வெளியிடவேண்டும்; செப்டம்பர் 30-ந்தேதிக்குள் மாணவர் சேர்க்கையை முடிக்க வேண்டும் என்றும் நேற்றுமுன்தினம் (வியாழக்கிழமை) பிறப்பித்த உத்தரவில் நீதிபதிகள் தெரிவித்தனர். இந்த பொது நுழைவுத்தேர்வால் தமிழகம் உள்ளிட்ட பல மாநிலங்களில் கிராமப்புற மாணவ, மாணவிகள் பாதிக்கப்படுகிற நிலை உருவாகி உள்ளது. இந்நிலையில் தேர்வுக்கு தங்களை தயார் செய்து கொள்ள கால அவகாசம் தேவை என்றும், மாநில மற்றும் மத்திய அரசின் சிபிஎஸ்இ பாடங்களுக்கு இடையே பெரிய இடைவெளி இருப்பதால் தேர்வுக்கு தங்களை தயார் செய்து கொள்ள கால அவகாசம் தேவைப்படுகிறது என்றும் மாணவர்கள் சார்பில் சுப்ரீம் கோர்ட்டில் மனுதாக்கல் செய்யப்பட்டு இருந்தது. இந்த மனுவை விசாரணைக்கு ஏற்க இன்று மறுத்துவிட்ட சுப்ரீம் கோர்ட் இந்த உத்தரவில் எந்த மாற்றமும் மேற்கொள்ள முடியாது. முன்பு அறிவித்த தேதிகளில் (மே-1 மற்றும் ஜூலை 24) தேர்வு நடைபெறும் என்று உறுதிபட தெரிவித்துள்ளது.