2-ஆம் ஆண்டு பியூசி துணைத் தேர்வு: ஜூலை 14-க்கு ஒத்திவைப்பு.

ஜூலை 7-ஆம் தேதி நடக்கவிருந்த 2-ஆம் ஆண்டு பியூசி துணைத் தேர்வு, ஜூலை 14-ஆம் தேதிக்கு தள்ளிவைக்கப்பட்டுள்ளது.  இதுகுறித்து பியூ கல்வித் துறை வெளியிட்ட செய்திக் குறிப்பு: ஜூலை 1-ஆம் தேதி தொடங்கிய 2-ஆம் ஆண்டு பியூசி துணைத் தேர்வு, ஜூலை 13-ஆம் தேதி வரை நடத்தத் திட்டமிடப்பட்டுள்ளது. ஜூலை 1-இல் சமூகவியல், கணக்கியல், இயற்பியல்,

ஜூலை 2-இல் பொருளாதாரம், கணிதம், தருக்கவியல், மனை அறிவியல், ஜூலை 4-இல் ஆங்கிலம், ஜூலை 5-இல் வணிகப்படிப்பு, வேதியியல், கல்வி ஆகிய தேர்வுகள் நடந்து முடிந்துள்ளன. ஏற்கெனவே அறிவிக்கப்பட்ட தேர்வு அட்டவணையின்படி ஜூலை 7-ஆம் தேதி கன்னடம், தமிழ், தெலுங்கு, மலையாளம், பிரெஞ்சு, மராத்தி, அரபிக் ஆகியபாட மொழிகளின் தேர்வு நடைபெறுவதாக இருந்தது. ஆனால் புனித ரமலான் திருநாளையொட்டி ஜூலை 6-ஆம் தேதிக்குப் பதிலாக ஜூலை 7-ஆம் தேதி விடுமுறையாக அறிவிக்கப்பட்டது. இதைத் தொடர்ந்து, ஜூலை 7-ஆம் தேதி நடக்கவிருந்த கன்னடம், தமிழ், தெலுங்கு, மலையாளம், பிரெஞ்சு, மராத்தி, அரபிக் ஆகிய மொழிப் பாடங்களின் தேர்வு, ஜூலை 14-ஆம் தேதி நடைபெறுகிறது. ஏற்கெனவே அறிவித்தவாறு, ஜூலை 8-இல் அரசியல் அறிவியல், புள்ளியியல், உயிரியல், ஜூலை 9-இல் வரலாறு, மின்னணுவியல், கணினி அறிவியல், ஜூலை 11-இல் புவியியல், நில அமைப்பியல், அடிப்படை கணிதம், கர்நாடக இசை, ஹிந்துஸ்தானி இசை, மனநலவியல், ஜூலை 12-இல் ஹிந்தி, சம்ஸ்கிருதம், உருது, ஜூலை 13-இல் சிறப்பு கன்னடம் பாடங்களுக்குத் தேர்வு நடைபெறவுள்ளன. இதில் எந்தவித மாற்றமும் இல்லை. தேர்வுகள் காலையில் 9 முதல் 12.15 மணி வரையிலும், மதியம் பிற்பகல் 2 மணி முதல் மாலை 5.15 மணி வரையில் நடத்தப்படுகிறது. அனைத்து பாடங்களுக்கும் தலா 100 மதிப்பெண்களுக்கு தேர்வு நடக்கிறது என்று அதில் தெரிவிக்கப்பட்டுள்ளது.