தேர்தல் பணியில் ஆசிரியர்களை ஈடுபடுத்தக் கூடாது.

தேர்தல் பணியில், ஆசிரியர்களை ஈடுபடுத்தக் கூடாது’ என, உயர்நிலை மற்றும் மேல்நிலைப்பள்ளி தலைமை ஆசிரியர்கள் சங்க பொதுக்குழு கூட்டத்தில் தீர்மானம் நிறைவேற்றப்பட்டது. திருவண்ணாமலையில், உயர்நிலை மற்றும் மேல்நிலைப்பள்ளி தலைமை ஆசிரியர்கள் சங்க மாநில பொதுக்குழு கூட்டம் நடந்தது. மாநில தலைவர் சத்தியமூர்த்தி தலைமை வகித்தார். மாநில பொதுச் செயலாளர் நடராஜன் உட்பட பலர் பங்கேற்றனர். கூட்டத்தில், உயர்நிலை மற்றும் மேல்நிலைப்பள்ளி தலைமை ஆசிரியர் காலிப்பணியிடங்களை, உடனடியாக நிரப்ப வேண்டும். 1987-1989 வரை வேலை வாய்ப்பு அலுவலகம் மூலம், ஒப்பந்த அடிப்படையில் நியமனம் செய்யப்பட்ட, இடைநிலை மற்றும் பட்டதாரி ஆசிரியர்களின் பணிக்காலத்தை, ஓய்வூதிய பலன்கள் கிடைக்கும் வகையில் முறைப்படுத்த வேண்டும். புதிய பாடத்திட்ட அமைப்பு குழுக்களில், ஆசிரியர் சங்க பிரதிநிதிகளை இணைத்து கொள்வதோடு, அனைத்து பாட குழுக்களிலும், உயர்நிலை மற்றும் மேல்நிலைப்பள்ளி தலைமை ஆசிரியர்கள் இடம் பெறுவதை, தமிழக அரசு உறுதிப்படுத்த வேண்டும். தேர்தல் பணிகளில், ஆசிரியர்களை ஈடுபடுத்தக்கூடாது. ஆசிரியர்களை ஆதார் கணக்கெடுப்பு, வாக்காளர் பெயர் சேர்த்தல், நீக்கல், வேலை வாய்ப்பு பதிவு செய்தல், மற்றும் சுகாதார பணிகளான தடுப்பூசி மற்றும் மாத்திரைகள் வழங்கல் போன்ற பணிகளை செய்ய வலியுறுத்தக் கூடாது. அனைத்து உயர்நிலை மற்றும் மேல்நிலைப் பள்ளிகளுக்கு, பத்து கம்ப்யூட்டர் வழங்கி, வைபை இண்டர்நெட் இணைப்பு ஏற்படுத்தி தர வேண்டும். மேலும் தகுதி வாய்ந்த கணினி ஆசிரியரை நியமனம் செய்ய வேண்டும் என்பன உட்பட பல்வேறு தீர்மானங்கள் நிறைவேற்றப்பட்டன.