அரசு பள்ளி ஆசிரியரை அடிக்கும் நபர்.. கோவில்பட்டியில் பரபரப்பு.

அரசு பள்ளியில் மாணவர்களை ஆசிரியர்கள் அடிக்க கூடாது என்று உத்தரவு பிறப்பித்த நாள் முதல் தற்போது வரை மாணவர்களுக்கு ஆசிரியர்கள் மீதான பயம் போய்விட்டது. அதன் தாக்கமாக அடிக்கடி விடுமுறை எடுப்பது, வகுப்புக்கு தாமதமாக வருவது, ஆசிரியர்கள் கண்டித்தால் திருப்பி மிரட்டுவது, பள்ளி சீருடைகளை தங்களது இஷ்டத்துக்கு தைத்து அணிவது, ஆசிரியர்கள் அடித்தால் அதை வீடியோ எடுத்து வெளியிட்டு அவர்கள் மீது நடவடிக்கை எடுக்க வைப்பது, சாதி பேரால் அச்சுறுத்துவது என ஆண்கள் அரசு பள்ளிகள் சிறார் சீர்திருத்த பள்ளிகளை போல மாறியுள்ளது.

மாணவர்கள் இன்றைக்கு என்ன தொந்தரவுகளை கொடுக்க போகிறார்களோ என்ற அச்சத்திலேயே ஒவ்வொரு நாளும் ஆசிரியர்கள் பள்ளிகளுக்கு வந்து செல்கின்றனர்.

இந்த நிலையில், தூத்துக்குடி மாவட்டம் கோவில்பட்டி அருகே உள்ள கீழநம்பியாபுரம் கிராமத்தில் இந்து தொடக்கப்பள்ளி செயல்பட்டு வருகிறது. இங்கு 1 முதல் 5 வரை மாணவ, மாணவிகள் படித்து வருகின்றனர். இப்பள்ளியில் தலைமை ஆசிரியராக குருவம்மாள் உட்பட சில ஆசிரியர்கள் பணியாற்றி வருகின்றனர்.

இந்நிலையில், இதே பகுதியைச் சேர்ந்த 2ம் வகுப்பு படிக்கும் மாணவியை தலைமை ஆசிரியர் குருவம்மாள் கண்டித்ததாகவும் இதனால் ஆத்திரமடைந்த பெற்றோர் அவர்களது உறவினர்களை வரவழைத்து பள்ளிக்குள் புகுந்து தலைமை ஆசிரியர் குருவம்மாள் மற்றும் இடைநிலை ஆசிரியர் பாரத்தை சரமாரியாக தாக்கியுள்ளனர்.

இது தொடர்பாக எட்டயபுரம் காவல் துறையினர் விசாரணை மேற்கொண்டு வருகின்றனர். இதனிடையே, இடைநிலை ஆசிரியர் பாரத்தை மாணவியின் உறவினர் பள்ளி வளாகத்துக்குள் துரத்தி அடிக்கும் வீடியோ வெளியாகி மிகுந்த பரபரப்பை ஏற்படுத்தியுள்ளது.

மாணவர்களிடம் ஒழுக்கம் வளர வெறும் அறிவுரைகள் மட்டுமே கை கொடுக்காது என்பதை ஆசிரியர் பெருமக்கள் நன்கு அறிந்தவர்கள். எந்த மாணவனை எப்படி கையாள வேண்டுமோ அப்படி கையாண்டால் மட்டுமே பள்ளிகளில் இவ்வாறான சம்பவங்கள் குறையும். மீண்டும் 10 வருடங்களுக்கு முன்பு அரசு பள்ளிகள் எப்படி இருந்ததோ அப்படி இயங்கும். வெறும் கவுன்சிலிங் கொடுத்துவிட்டால் மட்டுமே மாணவர்கள் நல் வழிக்கு திரும்பிவிடுவார்கள் என்பதெல்லாம் சரிப்பட்டு வராது என்கின்றனர்.