4 ஆண்டுகளில் 72 ஆயிரம் ஆசிரியர்கள் நியமனம்: கல்வி அதிகாரி தகவல்.

4 ஆண்டுகளில் 72 ஆயிரம் ஆசிரியர்கள் நியமனம் செய்யப்பட்டுள்ளதாக கல்வி

அதிகாரி ஒருவர் தெரிவித்தார். மாநிலம் முழுவதும் உள்ள குழந்தைகளுக்கு தரமான கல்வி அளிப்பதற்கும், அடிப்படை உட்கட்டமைப்பு வசதிகள் மற்றும் பாதுகாப்பான சூழ்நிலையில் குழந்தைகள் கல்வி கற்கும் வசதியை அளிப்பதற்கும் தமிழக அரசு முன்னுரிமை அளித்து வருகிறது. அனைவருக்கும் தரமான கல்வியை வழங்குவது என்ற அரசின் நோக்கத்தின் ஒரு அங்கமாக பள்ளிகளை தரம் உயர்த்த முதல்-அமைச்சர் ஜெயலலிதா ஆணையிட்டார். தொடக்கப்பள்ளிகள், நடுநிலைப்பள்ளிகளாகவும், நடுநிலைப்பள்ளிகள் உயர்நிலைப்பள்ளிகளாகவும், உயர்நிலைப்பள்ளிகள் மேல்நிலைப்பள்ளிகளாகவும் தரம் உயர்த்தப்பட்டன. கடந்த 4 வருடங்களில் புதிதாக 72 ஆயிரத்திற்கும் மேற்பட்ட ஆசிரியர்கள் நியமிக்கப்பட்டுள்ளனர். அரசு பள்ளிக்கூடங்களில் புதிய வகுப்பறைகள் ஆயிரக்கணக்கில் கட்டப்பட்டுள்ளன. அனைவருக்கும் கல்வித்திட்டம், இடைநிலை கல்வி திட்டம், நபார்டு ஆகியவற்றின் சார்பில் தமிழ்நாட்டில் கழிவறை வசதி இல்லாத பள்ளிகளில் கழிவறை கட்டப்பட்டு உள்ளன. 95 சதவீத பள்ளிகளில் கழிப்பிடவசதி உள்ளன. மீதம் உள்ள 5 சதவீத பள்ளிகளில் என்.எல்.சி. போன்ற நிறுவனங்கள் மூலம் கட்டப்பட்டு வருகின்றன. அந்தப்பணி இன்னும் 2 மாதங்களில் முடிவடையும். இந்த தகவல்களை கல்வி அதிகாரி ஒருவர் தெரிவித்தார்.